Marzo en lila.

Comezamos o mes cargado de actividades e moitas máis que virán que adiantaremos no seu momento. Desde ás áreas de Cultura, Igualdade e Mocidade levaranse a cabo unha serie de accións ao longo de todo o mes de marzo dirixidas á conmemorar o Día Internacional das Mulleres, o 8 de marzo. Por iso, imos chamarlle a este mes, Marzo en lila. Marzo desde outra óptica, desde a visión lila que pretendemos achegar á cidadanía e as xeracións máis mozas. Queremos un Día internacional das Mulleres con sentido e significado. Que o oito de marzo non quede nun acto meramente testemuñal. Facer do oito de marzo todos os días do ano!! Iso queremos. Si, obxectivo extremadamente ambicioso. Máis temos a forza, gañas e ilusión alo menos para intentalo.

7 de marzo, actividade do alumnado do ciclo de Educación Infantil do  CIFP Porta Da Auga

Mañán día 7 de marzo hai prevista unha actividade para o alumnado de Educación Infantil.Grazas ao 2º curso do Ciclo Superior de Técnico en Educación Infantil, do CIFP Porta da Auga, e a súa profa, Cristina del Prisco por organizalo haberá un contacontos centrado no “Libro dos Porcos” de Anthony Browne.Este conto achéganos desde un punto de vista non sexista as personaxes para comprender a importancia da igualdade de xéner, á par que ensinan que todas e todos debemos ter as mesmas oportunidades.

20 de marzo, ” O ratiño presumido” . Contacontos teatral para Infantil

A gran Lilí Gruyére ven de recibir un importante encargoprofesional: a dirección do Musical” a ratiña Presumida”. Despois de reflexionar sobre os valores que transmite este conto decide facer a súa propia versión: “ o Ratiño  Presumido”, que será representado no coles  coa axuda  dos profesores e profesoras.Este contacontos será representado pola compañía tetral Trinketrinke .

24-29 de marzo:  obradoiro de manexo e creación de espectáculo de títeres para Primaria

Utilizarase o teatro entendido este como un instrumento de sensibilización e cambio social aplicado á educación en igualdade.

A actividade consiste na creación por parte do alumnado participante  dun  espectáculo propio de monicreques. O alumnado elaborará o propio espectáculo de monicreques, desde o deseño do guión, dos materias até a  representación final do mesmo.

O guión versará sobre contidos en igualdade. Son sketchs teatrais breves que logo terán que representar.  Desta forma poden aprender, falar, discutir e avanzar  nos valores da igualdade e non discriminación hacía ás mulleres dunha forma amena, didáctica e  moi efectiva

16 de  marzo:  obra de teatro :    “ As do peixe”.

As do peixe” é  unha obra orixinal de Cándido Pazó que leva aos escenarios  a  compañía Abrapalabra Creacións Escénicas. A peza conta coa  dirección de Cristina Domínguez, a escenografía de Carlos Alonso e coas  actrices Mónica Camaño, Rocío González, Susana Dans  e Casilda Alfaro nos papeis protagonistas. É un viaxe a través da memoria, unha crónica das mulleres traballadoras da conserva, basada en  testemuñas reais da  vida nas fábricas a partir dos  anos setenta e contada desde o momento actual.

Catro mulleres, Conchi, Begoña, Lisa e  Tere, reúnense periódicamente nun espazo público dedicado á memoria das conserveiras. Aquí tratan de rememorar  o seu pasado laboral e o  de tantas mulleres que, despois de que a fábrica de conservas máis importante da vila pechase, despois de moitas loitas  e  desenganos,  atopáronse sen traballo e sen posibilidades reais  de volver a recuperalo. A súa historia, e a  de moitas outras  mulleres das vilas mariñeiras que quedaron sen traballo, amosan unha realidade: o derrumbe dunha economía e  dunna maneira de vivir.

Lugar: Auditorio Municipal Hernán Naval

Hora: 20.30h

Prezos entradas:

• 3,5€ para persoas desempregadas
• 5€ para público en xeral

 

Queres saber un pouco máis do 25N en Ribadeo?

Faremos algo porque sempre convén lembrar  o significado do 25 de novembro, para seugir alzando a voz ante esta porblemática que non cesa. Máis desde  á área de igualdade do Concello de Ribadeo procuramos que todos os días sexan 25, e traballar a prol desta causa ao longo de todo o ano.

Como vén sendo habitual, a Mesa  Interinstitucional de violencia de xénero do Concello de Ribadeo, que está integrada por persoa sanitario, educativo, polos FCSE, Policía Municipal e máis persoal do Concello,  emite un comunicado con motivo do Día Internacional contra á violencia de xénero.

Velaquí tedes íntegro o comunicado enviado á prensa :

O  número de denuncias por violencia de xénero nos últimos 5 anos  disminuíu nun 9,6%, según o Observatorio contra a Violencia Doméstica e de Xénero do Consello Xeral do Poder Xudicial ( CXPX). Esto non se corresponde coa disminución do número de casos, senón que estamos ante unha bolsa oculta de maltrato que non deixa de medrar. O primeiro trimestre deste 2013 equipárase nas denuncias interpostas ao número das presentadas no primeiro trimestre do 2007, que foi o momento no que se comezou a recoller ese dato na estatística xudicial. 

Por outra parte, os recursos  para ofrecerlle ás mulleres vítimas de violencia de xénero cada vez son menores e a sensibilidade das persoas nos diferentes ámbitos( policial, sanitario, educativo, social e xudicial) minguou considerábelmente.  Hai unha mensaxe de desmoblización e desesperanza para quen no seu fogar, en silencio sofre día a día esta barbarie froito do patriarcado.

A crise está a ocasionar  o recrudecemento da violencia económica. As mulleres afectadas pola reforma laboral, polos recortes en dependencia, polos despidos teñen que volver a depender das súas parellas, reconvertidos como antaño nos principais sustentadores da economía familiar. Todo isto, unido ao aillamento, o maltrato psicolóxico que anula ás vítimas deixándoas  sen vontade, ou ao medo  aos  golpes e  a morte ten un resultado final enganoso:  redúcese o número de denuncias, pero non  porque  disminuíran os casos de violencia. Por poñer, un dato, no que levamos de 2013, só un 18,2% das mulleres asasinadas  denunciara previamente ao seu agresor.

O empeoramento económico acompañado de falta de alternativas desde as institucións ten un efecto disuasorio nas  vítimas. De novo, estamos ante unha situación que require a necesidade de emancipación das mulleres para poder dar o paso a unha vida independente do agresor.  A violencia económica é moi agresiva, terríbel, porque non se ve e non se detecta. A violencia económica leva á violencia psicolóxica, pero ambas son díficiles de probar o que leva engadido que para demostrala, a vítima ten que atoparse cunha xuíza ou xuiz que sexa capaz de recoñecer os síntomas desta violencia psicolóxica.

Outra circunstancia preocupante  é a disminución das medidas cautelares impostas polos xulgados de violencia de xénero. Por exemplo, das 7.750 ordes de protección acordadas no primeiro trimestre do 2012, este ano, no mesmo período do anos só se ditaron 4583, o que supón un descenso do 7,11.

 Cabe subliñar tamén  a práctica cada vez máis extendida por parte dos maltratadores de poñer fin á muller acompañada das e dos fillos, como está a acontecer nos casos  máis graves de violencia, que son os que rematan en feminicidios (que é como en verdade deberíamos chamar aos asasinatos das mulleres) . Neste ano 53 mulleres e 7 nenos/as perderon a vida. 

E por último, queremos amosar a preocupación polo incremento de casos de maltrato entre nenas e adolescentes influído tamén  porque o  inicio das  relacións de noviazgo no Estado español  adiantouse aos 13 anos. Un tercio das mulleres que son vítimas de violencia de xénero son menores de 30 anos. O maltrato non se ciñe ás agresións físicas. Comezan a darse formas de violencia máis propias desta xeración, as que xurden co uso das novas tecnoloxías  que resultan aínda máis díficiles de detectar e distinguir. As redes sociais, os servizos de mensaxería utilizados nos teléfonos móviles, como o Whatsapp, entre outros instrumentos están facendo dano entre a xente moza, combinado con outras formas de violencia máis propias desta xeración como a que se exerce cos ciumes. Un alto porcentexe de xoves recoñece os ciumes como unha manifestación de  amor  no canto de calificalos como unha forma de control.

Son formas de violencia máis silenciosas pero que é importante que sexan recoñecidas para ser combatidas.

Charla o vindeiro 25 de novembro na Casa dasLetras :

E para sabermos un pouco máis destas violencias máis ocultas, o luns 25 de novembro temos unha charla ás 20.15 h na Casa das Letras, onde imos contar cunha das colaboradoras de Pikara Magazine. Bárbara G. Vilarinho disertará   arredor de ” Por qué o chaman feminazi, cando queremos decir igualdade??

 

Estamos a voltas co II Plan de Igualdade para o Concello de Ribadeo. Algo que achegar??

Levamos uns meses que non paramos. Actividade constante, incesante,… Temos o blogue algo abandoado. Máis en canto remate este mes… voltaremos á carga, tentaremos estar aí para partilar con vós reflexións, preocupacións e informar das accións que se emprenden tanto en Ribadeo como noutro lugares, sempre na búsqueda desa igualdade de xénero que non chega.

Agora mesmo estamos mergulladas nun intenso traballo que é a elaboración do II Plan para a igualdade de mulleres e homes 2013-2016 no Concello de Ribadeo. Para a súa elaboración contamos con financiación do Fondo Social Europeo e da Secretaría Xeral de Igualdade da Xunta de Galicia.

Entanto, deixámosvos a Avaliación do que foi o noso I Plan de Igualdade Local Memoria avaliacion I Plan de igualdade Ribadeo

Estamos abertas as vosas suxestións. Podedes deixalas aqui.

O spot Igualámonos xa está na rede.

Con motivo da conmemoración do 8 de marzo, o Día Internacional das Mulleres   activouse unha campaña de sensibilización social arredor dun formato atractivo e  actual, no que fose a xente a que participara directamente. Durante os días 6, 7 e 8 de marzo desenvolveuse un photocall pola igualdade en diferentes lugares do Concello. O lema  elixido para o phototcall foi  “Igualámonos” para transmitir que tanto mulleres como homes temos que ter os mesmos dereitos e obrigas, que o xénero non é nin debe ser condicionante  dos roles e estereotipos.Constatamos certo relaxamento social  na defensa da igualdade en todos os ámbitos e por iso, puxemos en marcha unha campaña deste tipo, na que as persoas participaran directamente.

O photocall “Igualámonos”   estivo de ruta ao longo de tres días, no mercado de Abastos,  nos centros educativos, no Centro Social, na Escola de Música,nas parroquias, ….

Tamén se acompaña a campaña dunha perfil propio no Facebook na que se  suben  as fotos para que a xente poida verse e etiquetarse, se así o desexa. É unha forma máis para  que a xente que se manifesta a prol da igualdade de xénero poda facer público este compromiso.   O enderezo no que atoparades a campaña é:   https://www.facebook.com/#!/Igualamonos

E recollendo estes días de andaina do “Igualámonos” xurde este spot. Este spot leva de fondo a canción de ” Non son fada, nin princesa”  de Mª Xosé Silvar, “Sés”. Aproveitamos tamén este foro para agradecerlle a Sés este xesto, deixándonos utilizar a súa canción para o spot.  Moitas grazas Sés polo teu compromiso feminista. E tamén moitas grazas a todas e todos vós, a todas as persoas que participachedes do Igualámonos, poñéndovos diante da cámara. O camiño cara un Ribadeo igualitario e en igualdade prosigue.

 

Xa pasou o 8 de marzo, máis nós seguiremos demandando igualdade e traballando por ese Ribadeo igualitario. Seguiremos nos camiños da igualdade.

Xa pasou o 8 de marzo, máis nós seguiremos demandando igualdade e traballando por ese Ribadeo igualitario. Seguiremos nos camiños da igualdade. Este ano, a conmemoración desta data deixou pegada  co descubrimento de 4 rúas  adicados á mulleres.

A elección deste día para inaugurar as rúas, non foi mera coincidencia. Quixemos renderlle  tributo que a estas mulleres dándolles o seu nome a unha rúa  nun día tan sinalado para a sociedade e sobre todo para as mulleres, como é o Día Internacional das Mulleres. Día conmemorativo das reivindicacións que emprederon as mulleres no ano 1857 para acadar os dereitos que as puxera en pé de igualdade cos homes, dereitos dos que carecían, como o dereito á educación, ao sufraxio feminino, a cultura, á vida pública  excluíndose da sociedade como membras activas negándolles polo tanto  o dereito a existiren .

A primeira das homenaxeadas foi a farmaceútica Manuela Barreiro. Foi  a primeira muller que cursou  estudos de ensino secundario no Instituto de Lugo  acadando  o título en 1896. Tamén a primeira en obter a licenciatura en Farmacia (1901) e a primeira en rexentar unha establecemento deste tipo en Ribadeo. Constanos polas actas do Concello que foron moitas as trabas que tivo que superar para conseguir a licencia de apertura  da farmacia. Porque daquelas ser muller, estudar, e por riba estudar unha carreira de ciencias, e despois exercer non estaba ainda ben visto. Até o século XVI no Estado español prohibíase  o acceso ás mulleres ao sistema educativo. Un século despois, institucionalízanse as ensinanzas de mulleres, aínda que limitandoas as tarefas domésticas, impostas como exclusivas do seu sexo. Máis adiante, no 1868 permítese o acceso ás mulleres á universidade, aínda que no ano 1890 só figuran 15 matriculadas na universidade. E aínda así, estas poucas mulleres que accedían á universidade debían enfrontarse a un dobre problema: a falla de recoñecemento e validez académica profesional dos estudos realizados, e a necesidade de  consulta previa á Administración Central para poderen ter autorización de formalizar a matrícula. Non será até o ano 1910, cando por medio  dunha Real Orde se estableza o recoñecemento legal a a cursar estudos como alumnas oficiais e sen limitación  e en igualdade de condicións aos homes. Non obstante, persistían as dificultades, e por ex as mulleres licenciadas en Farmacia tiñan coma única saída a de rexentar boticas, mentras que as licenciadas en dereito tiñan terminantemente prohibido o exercicio da profesión.Unha actuación da Escola de Música de Ribadeo pechou o acto.

Despois nos diriximos á segunda das rúas, para descubrir a praca da Rúa Sor Pilar de León,  muller que destacou pola sua adicación á ensinanza e vocación musical. Ela foi a precursora, a ensinante de moitos dos grupos cantores das misas, inclusive compoñendo ela mesma  as pezas relisioxas. Por  iso, queremos renderlle este pequeno homenaxe   a esta gaditana que adoptamos en Ribadeo onde pasou a ser unha ribadense máis,deleitándonos coa súa   sabiduría musical para deixar unha fonda pegada neste Colexio, en moitos dos nenos e nenas que pasaron polo mesmo , na Coral Polifónica de Ribadeo da que é membra de honra e  por suposto en Ribadeo. Nesta ocasión foi o Coro do Colexio Sagrado Corazón de Xesús o que pechou o acto.

A xente que participou nestas inaguracións ía aumentando e  achegámonos a Rúa Meniñas da Saudade.Visibilizar e recoñecerlle o papel a estas mulleres que tiveron a  afouteza de rachar moldes nos anos 60, nos anos escuros nos que as mulleres aínda tiñan que pedir autorización marital para asinar un contrato co banco , no que  as mulleres aínda non tiñan liberdade para decidir por elas mesmas. Mulleres  xoves, mulleres que levaron o nome de Ribadeo por lugares onde nunca escotaira falar da nosa vila.  E as Meniñas de Saudade podemos decir, que foron as embaixadoras de Ribadeo  e da cultura popular  do noso país  dando a coñecer a nosa vila por todos os lugares  aos que as convidaban. Causaron furor  e expectación  por ser mulleres mozas, mulleres gaiteiras e por ser unha banda de gaiteiras onde non había homes. Moi inusual para aquela época. Elas inauguraron o ferrocarril da Costa e o primeiro barco de Pescanova en Vigo, filmáronas en Betanzos para a película Asi es Galicia ( dirixida pos Santos Núñez, 1964)e no documental de Galicia Insólita apareceron no NO DO. Estiveron no Gran Teatro de Lisboa, na Televisión portuguesa e percorreron Galicia e Asturias. En 1997, a raíz da súa aparición na TVG, Saudade desfilou por última vez polas rúas ribadenses na Cabalgata de Reis. Consideramos que  a primeira banda feminina en Galiza e no Estado mercecía como mínimo este recoñcemento. Tamén a Escola de Música amenizou o acto cunha actuación dunha parella de gaiteir@s.

 E xa o final, foi a inauguración da praca que dará vida á praza 8 de marzo. No  ano 1911 celebrouse o primeiro Día Internacional da Muller Traballadora no que participaron publicamente máis  dun millón de mulleres. Ademais do dereito ao voto e a ocupar cargos públicos, demandaban o dereito a traballar, á ensinanza vocacional e á non discriminación no traballo. No 1977  as Nacións Unidas institúen  o 8 de Marzo como o Día Internacional da Muller. As loitas das mulleres galegas tamén tiveron o seu eco nas vindicacións formuladas nos anos 70 polas mulleres da industria conserveira, polas labregas, polas empregadas do fogar  e do sector textil, …. até hoxe en día con reivindicacións tan vixentes e actuais como  “mesmo salario a mesmo traballo”. Abriron o acto o alumnado da EMeD de Ribadeo  cun par de actuacións de danza acompñadas por unha pequena orquesta. A continuación, as xoves creadoras de Ribadeo leron os textos que aparecen no caderno “ Rachando inercias”.

O broche final do día o puxeron as Irimia Cantareiras. Estas mozas de Meira que nesta ocasión veñen acompañadas dunha parella de baile do proxecto danza que fusiona baile tradicional galego con outros estilos de baile como danza contamporánea, tango, hip hop… e incluso con outras disciplinas como videocreacións e teatro, pero sempre tomando como base a base da danza tradicional.

E mentras acontecía todo esto, o photocall ” Igualámonos ” estaba na rúa. podedes ver as fotos nesta páxina: http://www.facebook.com/Igualamonos