A arte de ser muller nun mundo por compartir 3.0

A Área de Cultura da Deputación Provincial de Lugo, a través da Rede Museística, porá en marcha en tres dos seus museos: no Museo do Mar de San Cibrao,Museo Pazo de Tor e Museo de San Paio de Narla a terceira fase do proxecto “ A arte de ser muller nun mundo por compartir. 3.0”.

Nel participan un conxunto de mulleres artistas apoiadas polo equipo de traballo da Rede Museística; co obxectivo de facer máis visible as mulleres dentro do mundo da arte e aportar un grauiño máis a prol da igualdade de xéneros e do cumplimento da lexislación vixente ao respecto. Esta fase do proxecto vai ter unha duración de 27 semanas, cunha exposición colectiva no espazo ainda que non no tempo e rotatoria xestionada e organizada en base ao axioma do “custe 0” e o traballo en rede.

Co proxecto “A arte de ser Muller nun mundo por compartir ” dende a Rede Museística preténdese dar visibilidade ás mulleres dentro do mundo da arte.As artistas participantes nesta segunda fase do proxecto expositivo e terceira fase do proxecto organizativo son: Sabela Arias,Julia Ares, Blanca Besteiro, Mercedes Cabada, Paula Cabaleiro, Montse Cea, Ana Costas, Yolanda Dorda, Cristina Fernández, Dolores Guerrero, Carmen Llonín, Rebeca López, Estefanía Novo, Ruth Núñez, Renata Otero, Elena Pendás, Xedes Peón, María Jesús Pérez, Laura Pernás, Noa Persán, Marta Prieto, Silvia Rodríguez, Montse Rego, Paula Salinas, María José Santiso, Magdalena Seixas, María José Vila.

O premio María Josefa Wonenburger 2011 recaeu en Ofelia Rey Castelao

A Unidade de Muller e Ciencia,  acordou por unanimidade conceder a Ofelia Rey, catedrática de Historia Moderna da USC, o premio María Josefa Wonenburger 2011.

Por primeira vez, o premio Wonenburger recae nunha investigadora da área das humanidades, no que constitúe unha designación que complementa a tendencia das anteriores edicións que centraron os galardóns no ámbito das ciencias experimentais, nas que foron sucesivamente distinguidas Inmaculada Paz Andrade (Física), Teresa Miras Portugal (Farmacia), María Soledad Soengas (Bioloxía) e Carmen Navarro (Medicina).

A Unidade Muller e Ciencia creouse en 2007 coa finalidade de incrementar a presenza da muller nos ámbitos científico e tecnolóxico de Galicia, mediante actuacións encamiñadas a promover a eliminación dos desequilibrios que poidan existir no relativo á formación científica, nas áreas da investigación, da innovación e na xestión da I+D+i e a situar nun primeiro plano a perspectiva de xénero na actividade científica. Entre outras iniciativas, instaurou o premio María Josefa Wonenburger para resaltar as traxectorias relevantes de mulleres nos eidos das ciencias e a tecnoloxía, baixo un nome que pretende ser unha homenaxe á figura da matemática coruñesa.

Un pouco sobre a figura da homenaxeada

Maria Josefa Wonenburger Planells (A Coruña, 1927) estudou Ciencias Exactas na Universidade Complutense de Madrid e, en 1953, trasladouse a Estados Unidos para se especializar el álxebra cunha bolsa Fulbright. Na Universidade de Yale leu a tese de doutoramento, dirixida por Nathan Jacobson, un dos mellores alxebristas do momento, e iniciou unha brillante traxectoria nesta materia como profesora en diferentes universidades –Toronto, Búfalo, Bloomington (Indiana) – e como directora de teses, entre elas a do matemático Robert V. Moody, en 1966. Da súa man, Moody iniciou na súa tese a teoría coñecida como Álxebras de Kac-Moody, con aplicacións en Física e noutros campos das Matemáticas. Voltou á Coruña, onde reside, en 1983.

Para coñecer máis desta figura: http://www.culturagalega.org/album/docs/sobre%202.pdf

“Gaiteiras “ como diría Xurxo Souto. A historia da gaita galega tamén ten nome de muller.

En Ribadeo formouse a primeira banda de gaitas femenina do Estado ( O grupo Saudade ) e en Celanova, uns anos antes ( 1919 )  temos constancia da  primeira gaiteira galega documentada e directora dun dos grupos máis famosos da Galicia de principios de século: Os Maravillas de Cartelle. Áurea Rodríguez  foi  bautizada como a raiña da gaita galega.

UN POUCO  DE HISTORIA DO GRUPO SAUDADE DE RIBADEO

Saudade nace baixo o mecenazgo de Carlos Súarez Couto en 1960. Son a primeira banda de gaitas formada exclusivamente por mulleres de Galicia e do Estado, e posiblemente en todo o mundo.

Nun principio foron sete: Teresa Amor Simón, Mª Dolores Ponte Forés, Elena Fernández, Mª Carmen Carnota López, Concepción Redondo Lastra, María Cubero Loredo e Teresa Rodríguez Ruíz, ao que foron sumándose posteriormente Carmen Rodríguez Ruiz, Josefa Otero López, Laura Alonso, Carmucha Pérez, Gloria Alonso Del Riego, Alvarita Diaz Muñiz, Marisa Peña Rego. A súa compositora tamén era unha muller, Amadora Suárez Couto.

A indumentaria que usaban era tipíca ribadense do S. XVIII . Para a confección  dos traxes documentarónse na Real Academia Galega, no Ballet Galego de A Coruña e en cadros do pintor Amando Súarez Couto. Dirixiu a confeccións dos traxes Matilde García de Paredes.

Inauguraron o ferrocarril da Costa e o primeiro barco de Pescanova en Vigo, filmáronas en Betanzos para a película Asi es Galicia ( dirixida pos Santos Núñez, 1964), no documental de Galicia Insólita apareceron no NO DO. Estiveron no Gran Teatro de Lisboa  e na Televisión portuguesa e percorreron Galicia e Asturias. En 1997, a raíz da súa aparición na TVG; Saudade desfilou por última vez polas rúas ribadenses na Cabalgata de Reis.