O teu tempo é para ti. Viaxes ao Balneario de Guitiriz.

No ano 2007 inciabámos un novo programa baixo o título  “O teu tempo é para ti. Coñécete a ti mesma, desfruta, reláxate“.  Con este programa queríamos achegarlles ás mulleres ribadenses un tempo para elas, para o seu desfrute, sen obrigas, sen quefaceres, de relax, de distracción, e de convivencia con outras persoas.

Un tempo propio para elas mesmas. Un tempo do que as mulleres carecen.

Por que? As condicións de vida inflúen na forma de vivir e comportarse as mulleres. Se repasamos o desenvolvemento da vida cotiá das mulleres, observamos o seguinte panorama: un horario sen límites, sen vacacións nin descanso, sin dereito a retribución, nin xubilación. As  mulleres realizan baixo o nome dos “seus labores”, diariamente unha serie de tarefas que se poderían resumir nas seguintes: cociña, limpeza, lavado e pranchado de roupa, reparacións, conservación de alimentos e utensilios, organización da casa e a familia, abastecemento, economía, puericultura, educación, hixiene, enfermería, xeriatría, confección, organización de ocio,… e moitas máis, fundamentalmente proporcionando os coidados, afectos, apoio, e sostenemento e estímulo ós demais membros da familia.

Este programa pretende, promover un envellecemento saudábel, contribuír a fortalecer a saúde das mulleres, ao tempo fomentar técnicas de relaxación, e favorecer  un espazo de seu ofrecendo un tempo propio, o seu tempo negado.

Esta primavera temos previstas dúas viaxes ao Balneario,  o domingo 10 de Abril en horario de tarde, e o luns 11 de abril en horario de mañán. Hai prazas limitadas.

Se queredes mais información non tendes mais que chamar ao CIM ( 982.12 0739 ) ou escribirnos ao mail: cim@ribadeo.org.

Nunha das viaxes ao Balneario no ano 2008.

Advertisements

Xa podedes ver a curta “A Xenia do fútbol e a arte de Fabio”

Xa está colgada na rede a curta gañadora da II edición do concurso de guións cinematográficos ” Cine nas aulas para a promoción da igualdade” . Esta curta está basada en feitos reais. As persoas que aparecen como protagonistas da curta, Xenia ( Maria Redondo) e Fabio ( Oscar Rodríguez) , na súa vida diaria   soportan os mesmos problemas que se reflexan na curta .

Agardemos que esta curta sirva para  espertar e abrir mentes!e que disfrutedes dela!!

 

As voces femeninas unirónse pola igualdade

O pasado domingo tivo lugar   o concerto “unindo voces pola igualdade“. Para aquelas e aqueles que non puidechedes asistir, vos deixamos unha sipnose do qué aconteceu.

A concelleira da Muller, Mariluz presentando aos grupos.

O espectáculo iniciouse coa actuación do grupo, Alesancia que combinaron as actuacións musicais con esceas teatrais alusivas ao significado do 8 de marzo, Dia internacional das mulleres.

Actuación do grupo Alesancia

Despois viñeron as Maktubikan,un dúo de etno blues, cunhas voces que lograron encadilar ao público.

Logo, puidemos contar coa habelencia de 4 mulleres que se atoparon nos camiños de Compostela hai 2 anos. Harmonía Humana. Herdanza. Historia Viva. Hiperactiva! a hipnose sonora de Habelas Hainas!!

As mozas de Habelas Hainas durante a súa actuación

E para rematar a noite, tivemos a actuación dunha formación musical, recentemente creada, a banda de “La ley de Hooke” . Son 4 mozas de 15 e 16 anos que se sumerxen no mundo da música pop-rock, ás que lles auguramos un bon futuro.

A banda de La ley de hooke

Un concerto onde desfrutamos  da capacidade creativa das mulleres, onde compartimos as aspiracións e reivindicaciónspor medio das  voces femeninas na procura dese  Ribadeo igualitario e en igualdade.

Unindo voces pola igualdade

O vindeiro domingo 20 de marzo, ás 20:00h, no cine- teatro haberá un concerto  que leva por título “ Unindo voces  pola Igualdade”.

Porque cremos que é fundamental manterse unidas nos tempos que corren e  demandar mais igualdade.

Porque cremos que hai que integrar ao sexo masculino na loita pola igualdade

Porque para conseguir ese Ribadeo igualitario, temos que participar e unírmonos todos e todas para derrubar as barreiras que impiden esa igualdade e discriminan a metade da humanidade, as mulleres.

 

Neste concerto van actuar grupos integrados por mulleres, porque nos parece importante que nun dia sinalado sexan as propias mulleres as  verdadeiras protagonistas, neste casos coas súas voces. Voces femeninas demandando mais igualdade.

As actuacións coas que imos a contar no concerto son as  seguintes:

Alesancia, que é un grupo de pandereteiras local creado nas Anzas, no rural de Ribadeo, e que amosa como as mulleres participan e dinamizan os núcleos nos que están inseridas.

Maktubikan: está integrado por dúas mulleres, unha holandesa e outra escocesa. O resultado deste dúo artístico e intercultural ven a ser unha música etno-blues, que logra encadilar ao público.

Habelas Hainas: é unha formación de mozas con moita marcha  que cantan cancións populares  pero de forma diferente ao que estamos habituados a ouvir

Agardámosvos!!!

 

 

Calurosa acollida na entrega de premios aos mellores guións e na proxección da curta ” A Xenia do futbol e a arte de Fabio”

As nenas e nenos  que protagonizaron a curta

Numerosas persoas, asistiron onte á entrega de premios e proxección da curta rodada ” A  Xenia do fútbol e a arte de Fabio“. Dende profesorado dos distintos centros educativos, alumnado, nais e pais das/os protagonistas ou finalistas, veciñas e veciños quixeron compartir esta cita  que se facía arredor do Dia Internacional das Mulleres, e centrada na campaña ” Un futuro por compartir en igualdade” A educación en igualdade é a mellor forma de combatir a desigualdade existente, hoxe en dia. Educar  as persoas que formarán as xeracións futuras,  nunha sociedade xusta e igualitaria.

Puidemos ver cómo recollían  os premios os 5 grupos finalistas do II concurso de guións cinematográficos ” cine nas aulas para a promoción da igualdade”. E a continuación, proxectouse a curta rodada, (o guión premiado como 1º premio debía ser rodado ), “A Xenia do fútbol e a arte de Fabio”.

Cóntovos un pouco de que vai esta curta:  Xacobe e Mariña teñen unha filla (Xenia) e un fillo ( Fabio) con afeccións pouco convencionais: a Fabio encántalle o mundo do baile e a paixón de Xenia é o fútbol. Con todo, non o teñen moi doado, ata o punto de que o pai e a nai chegan a cuestionarse se a educación que lles están inculcando é beneficiosa para ambos. Fabio consegue demostrar a súa valía entre as compañeiras  e compañeiros do colexio. As amigas de Xenia apoiana e buscan unha solución ante a segregación sexual de que é vítima no fútbol.  Estas experiencias marcarán as súas vidas ata o punto de que Fabio chegará a ser un publicista de sona e Xenia, médica deportiva dun equipo de primeira división. Proximamente colgarémola na rede para que a poidades ver todas e todos e saber as vosas opinións. E tamén contará cunha unidade didáctica para poder traballar nos centros educativos, os roles, estereotipos e aficcións das crianzas.

As e os  16 finalistas por ser as e os guionistas dos 5 traballos elexidos polo xurado

O grupo gañador, as e os guionistas da curta,ofreceron unhas palabras de agradecemento

Festival arte + parte 3 na Coruña

Este sábado 12 de marzo, a partir das 18:00 h., celebrárase en EXPOCORUÑA a terceira edición do festival ARTE+PARTE, organizado pola Concellaria de Igualdade e participación cidadá  do Concello da Coruña.

Un programa moi completo onde as mulleres son as protagonistas, un festival onde se visibiliza a capacidade e potencial creativo das mulleres. Mais información no blogue: http://mulleresarte-parte.blogspot.com

Podedes botarlle unha ollada ao video promocional do Festival:

 

 

Música con protagonismo feminino

Amparo Ochoa, cantautora mexicana, rende homenaxe á figura feminina nesta canción: